Monday, August 23, 2010

رمضان ...!


مبارك عليكم ما تبقى من الشهر

وااايد اسفين ع لتاخير و لكن الظروف في رمضان اسم الله علينا شي ... عافور...حموله ... زواره...مواجيب...غبقات... قرقيعان... يهال...بعد هذا نقولكم ان شاء الله تعودونا كل سنه و تصومونه

ما شفنا ويوه بعض الا امس


الشطّه: واااي وااااي وخروا خالتي عن ويهي.... خل تفارج ... كل ما جابلتني انهدت و قالت بطن جنّه!!!!! انا صايمه صاااايمه صاااايمه...ما اكل....ما شافت شيفتها اهي و عيالها يلفون لف و انا يالله من فضلك شويه تشريبه على شويه سلطه هريس مني و كبه بلبن مناك جم سمبوسه على جم خبز عروق و الحفهم بشويه لقيمات ... كفرت!!!!1

النسره: لا لا لا لا اللي ياج و لا شي من اللي ياني... شواهه اللهم يا كافي حموات مشوّهين الحمدالله و الشكر... اقول ابلعها انا صايمه لا مو افطر لا اكفر فيهم.... يتجابلون يخوزرون و يتطنزون ما ادري على شنو بنات عبدالغني شربت... وصلت فيهم يطرشون عيالهم يتللون بالكستنشن مال شعري لين تنتف شعري يمال الدقّام


العسره: لا عاد انا اللهم لك الحمد و الشكر يا حلو يمعت رمضان ... ابد ابد دعايه الوطنيه هالسنه... الله لا يغير علينا ... الريل ماد البوز و مسمعنا كلمتين و لين ركبنا السياره ما يبقى احد ما يتهاوش معاه.. العيون باقها و يخوز فينا انا و اليهال


الشكّاكه: انا خالتي اتطالعني و انا اكل و تقول حق ريلي و الاكل تارس حلجها يما شفيك ضعفان و ويهك منصفق صارلك سنه على هالحال... علما بان زواج شكّاكه عمره سنه....و مرتك مير الويه فدقه و راده روحها... ما درت ان الريل تعقد بسبه ان اول كانت المسعده امه تخشش الاكل عنه عشان يضعف... عقب ما تزوج صار غالي



الفاصله: اه يالقهر انا مو ذابحني و موتني قهر اللا هالموزه حاطينها يحرحرون فينا خل اتعّلم خالتي منها شوي جانها ملوعه جبدي

الشله: هوووو... خالتج مو متوفيه!!!1





bye xoxo









Wednesday, August 4, 2010

مسلسلات...!


تيمعنا و كان الموضوع كالاتي:!!1



الشطه: بتابع كل المسلسلات في رمضان... ايشوقووووووووووووون شنشوف شنخلي.... بس ترى لازم كلّنا نتفق على اي مسلسلات بنتابع علشان الحش باليمعه


النسره: و اللي يعافيج نبي نتابع مسلسلات نظيفه لا فيها مخدرات و لا مشروب و لا مأسي و تكمّش ... درب الزلق و رقيه و سبيكه وخالتي قماشه فيهم شي؟ يا حلوهم لمّا الحين اشوفهم و الابتسامه شاقه حلجي ... اكو احلى من النظافه... ويع علينا راضين ناس ما نعرفهم يمثلونا جدام الله و خلقه


الشّكاكه: ولا سحوره و لا خيانات و حبني و حبّك... يا حلوها هبه حماده... مسلسلاتها ذربه ... بتابع زواره خميس دعايتها اتشوق


نطّت الحنّه: انا انا انا ... ابي اشوف عايزه اتجوز ... واااااي شكلها خف طينه... تدرون كانت بلوق و صارت كتاب بعدين مسلسل


العسره: انا والله شوقتني زهره و ازواجها الخمسه

و للمره الاولى الفاصله تشتط و تندمج بالموضوع

الفاصله: واااااااااي ياربي عيب عليهم احنا برمضان.... شنو زهره و ازواجها الخمسه و الشرع حلّل اربع


بدّعت!!

bye xoxo


Sunday, August 1, 2010

الغزو...!

الغزو كان موضوعنا (الله لا يعيد الشر) ... 1
العسره: شتهقون بنسوي لو لمّا صار الغزو 1990 احنا بالعمر اللي احنا فيه الحين... شبنسوي؟1
المشتطّه: اقعد.. اقعد... و هم اقعد... و لا اطلع .. تبهذلنا برّه .. الواحد يموت بديرته ابرك... و بعدين اللي خايف من الموت ترى محد يموت اللا بيومه يالله الينّه و شهيده بعد يا بختنا
النسره: و الله لا اقعد و اطلع حرتي ابواحد واحد .. اللي راحوا منا غالين و انا مو اغلى منهم.. ابرّد قلبي و ما يبقى شي ما اقوله و اسويه.. لي الحين حرتّي بقلبي .. بس اللي برّد جبدي الكويتين يا حلوهم عيالنا و شيابنا و بناتنا و يا حلو قلوبنا و نظافتنا .. ترى ما يشيل الكويتي الا الكويتي .. و تقولون اطلع و الله على قص رقابنا انا و عيالي ما طلعت
الشكّاكه: ما ادري ما جربت كنّا بره... بس و انا بره كنت اشوف امي و ابوي شلون قلوبهم متنهنهه على الكويت ... بس اتصدقون كنت صغيره بس كان فيني روح وطنيه غريبه .. كنت وايد عنيفه يا ويل اللي اييب طاري الكويت على اللسانه اكله هاهاهاها بس لو انا بالكويت اكيد بقعد شيطلعني!1
الحنّه: و الله يا حلو الكويت و اهلها... الواحد الزم ما عليه كرامته و الواحد من غير وطن ما عنده كرامه.. بس و اللي يعافيكم جان بتردوني عشرين سنه ورا و انا بهالعمر ردوني مع ريّل يضفني و يدير باله علي ... بعد فقر و قلدمه
طالعنا الفاصله ننطرها تعلق.. العسره استعسرت و قالتلها
العسره: فاصله... بتقعدين و اللا تطلعين؟؟؟؟1
الفاصله: هَووووووو.... ليش اطلع تو الناس حتى العشا ما حطيتوه!!!1
bye xoxo

Wednesday, July 28, 2010

ليش...!

تيمعت الشله كالعاده و بطلنا موضوع كان مضايق العسره وايد ... فقترحنا نقولكم اياه و نبي نسمع رايكم بصراحه
العسره: تصدقون وايد متضايقه بالدوام... اللي قاعد يمّي بالبارتيشن متزوج و معيّل و مرته دايما اتدق عليه علشان تبي منه شي .. يا يدليها .. يا تبي اغراض حق البيت... يا تسأله شتبي ع الغدا.... و مرات وايد اتدق تسأل عنه ..... و هو يكلمها بصوت وايد مسموع " هااااا شتبين" .." و الله فاضيه"... ما عندي فلوس ... يوم بنزره .. يوم منفّس... ... بس كل يوم يصكّه منها و يقول " افففففففففففففففففففففففففف"
النسره: قطيعه... صج ما يستحي على ويهه...تلقينها لايعه جبدها من مسؤوليات البيت و صيحه اليهّال و تشيل التليفون عليه علشان اتحسسه انه مهم.... و تلقينه مطلعها من دوامها عشان تندثر... ماكو فايده الرياييل ما يخافون الله بهالحريم
العسره: نسره... مو هذا الموضوع اللي يضايق....اللي يضايق يصكه منها و اكو واحده قاعده بالبارتشن اللي يمه....كل يوم طايحينله سوالف و ضحك .. و اهيا اتميع عليه و اهوا يكلمها بكل ادب و النفس حلوه... و مرات يطقون على بعض البارتشن هو يطق و اهي اتطق معاه و يضحكون
النسره: يا ماااال الضربه حتى يا مااال الضربه.... و الله ما تستحي و هي تسمع و تدري ان الريّال متزوج و عنده عيااااال ..... سمّام
المشتطه: وييييييي تلقينها ما يحلالها السوالف الا عقب نزره المره ويع عليهااااا

العسره: و لا تشوفينه .... شي ما يسر نظرج

اتهقون منو غلطته؟ ليش الريال يحلى بعينه اي مره غير مرته؟ و يعطيها كل اللي المفروض يعطيه مرته؟ و ليش البنات يتنقّزون حق الريال و تدري انه متزوج؟ لو يوم تزوجت او اهيا متزوجه ترضي وحده تنط على ريلها؟ و اهوا يرضى لو مرته تشتغل يتحرش فيها واحد و يكلمها مثل ما يكلم هالسعلوه؟
نبي ارائكم بصراحه بليز
bye xoxo

Sunday, July 25, 2010

البوز...!

قررت الشله تكسر الروتين و تتغدى بره... قعدنا يم طاوله فيها ريّال و مرته ... منفسين الله يهنيهم... اهيا ماده البوز اسم الله عليها... و هو يا يتلفت... يا يطالع مسجاته... و دار هالحوار
العسره: امبييييييييييييه من صجهم هذولا ... شهالعساره ... فشلت الريّال.. بس اتخوزر فيه و تعطيه نظرات و ترفعله الحاجب ... يمّاااااا
النسره: لا حبيبتي لا يكسر خاطرج و لا شي تلقينه ملوّع جبدها ... و لاعن خيرها بالسياره و البيت ... و مطلعها بطلعت الروح.. و صيحه يهّال .. و قاط عليها كلمتين و يايبها خنت حيلي
المشتطه: اتهققققققوووووون.....!!!!..... و الله احس قاعده تسويله موديلات علشان يساحلها ... بس اتصدقون اهيا غلطانه الريال قاعد و هالبنّي كل وحده تقول الزين عندي و الضحكه شاقه حلوجهم و هو مجابل هالودره... و الله لو انا مكانه جان انحشت من زمان
الشكّاكه اتطالعها و متحسره اتقول : بيطييييييييييييييييييير يالخبله ... واتأشر على الحنه و تكمل : و بتصيرين نفس هالمقروده
الشله : علميييييييييي نفسج!!!!!!!!!0
الفاصله تنادي الويتر:
excuse me the sad lady over there .... may i know what she ordered ... her dish looks good!!!
bye xoxo

Tuesday, July 20, 2010

الفال...!

بالويكند قررنا نطلع الشاليه... صاحبتنا لولو الخليجيه يايه الكويت... كانت تدرس معانا في امريكا... الشله قررت تكون شريره... "شكاكه" مصختها بالشك ومتزاعله مع ريلها .. و مهما نحجي ما تسمع الا نفسها ... فبختصر لكم اللي صار
الشله: لولو ... "شكاكه" زعلانه و الي قاعده اتسويه ابريلها وايد .. نبيج اتسوين اللي نقولج عليه

لولو : حاضر ... الله يعينك عل نفسك يا شكاكه .. الله يشافيكي على يدّي (ايدي) ... وايد متفائله لولو المسكينه
رحنا الشاليه و استانسنا و سولفنا وصار وقت الخطه
لولو: مين يبغى اطالعله الودع
شكاكه نطّت من مكانها: انا انا تكفين.... و الله لا اطلع خماجيرك كلها يا فلان يا ولد فلانه
لولو بعد ما طشّت الفال و خزته: شوفي شكاكه كاني اشوف وحده مسافره بتلاحق زوجك ... (الشله ابطنها سالفه فلان المقرود اللي رايح شغل و الاخت مستعسره عليه)..0
شكاكه: شفتووووووووووووووووووووووووووووووووووووووووووووووا ... انا قايله... عرفتها ... عرفت منو ... فلانه ماكو غيرها ... حاطه الستاتس مالها في ال بي بي
!!!!!!!!" london-ing"
لولو: بس...0
شكاكه: و كل ما حطت انها زعلانه .. ريلي راد ماد البوز ... تذكرون مرّه لمّا ييتكم و ك.....0
النسره: لا ما نذكر و لا نبي نذكر ... بس بس يننتي الريال مسكين .... الله بيعاقبج و ييبلج وحده على قلبج علشان تيوزين ... كنا نتغشمر ... انا اخترعت و لو شوي بعد جان صدقت انه بيسافر مع وحده ... رحمي نفسج من الافلام
شكاكه: مو بيدي نسره ... و الله مو بيدي .. ما ابي اعيش حياه امي ... تعقّدت ... اصلا فجاه صار يحب السوشي ... و اهيا اتعرفونها حافظه منيو ماكي كلّه!!!!!....0
الشله: يما منج يمّااااااااااااااااااا ما خلصنا! نتغشمر نتغشمررررررررررررر
لولو جنه احد فالعها بقلاص : حالتك صعبه .... ايش اللي بيحصل
العسره: اقولج شي ... انتي تبين توصلين ريلج مرحله اي عندي كيفي مو عاجبج قضبي الباب يالله اتطخين

اعتفست القعده عن غير قصد ... و شكاكه غورقت عينها.. و حاشنا تانيب ضمير مو طبيعي ... و قعدنا نتخازز اشاره ان احد يسوي شي يلطف الموضوع

الفاصله: شفيكم اتخزون....و الله ما احب السوشي

bye xoxo


Friday, July 16, 2010

الزواج...!

خلصنا اشغالنا و تيمعنا مثل العاده
الحنّه: هااااااي بنات
الشله: ياااا هلا ياااا هلا... الللللللللللللللللله شكلج ايعقد من وين يايه
الحنّه: سكتوا سكتوا ... مفّوره حدي و نفسيتي حالتها حاله
العسره: اكييييد الواحد يفور من هالحر اللي بره انطبخت روسنا
الحنّه: توني راده من بيت عم ابوي و الكل موجود .. كل ما وحده عيوز مشوربه طلت ابويهي قالتلي غميضه عليج و ين الريايل ما يشوفون... و الثانبه اتقول لالالالا انتي مو شاطره .... عيل **** الشيفه يابت الريل و انتي لمّا الحين عند ابوج يا بعد قلبي قلبه شقيان فيكم ما طلعتي على امج يو....!!!! @@0
النسره: شوفي هذا مجتمعج الحلو... ... مو متزوجه اطحنوا على راسج لما اتزوجين... تزوجتي طحنوا على راسج " ما حملتي"... حملتي اطحنو على راسج " بنت و الا ولد... و متى تولدين"... يبتي بنت اطحنو على راسج "ها متى الولد"... لما تكودين بهالعيال و ينحاش الريل ذيك الساعه يطخون عنج
العسره: صااااااجه يعسرووون.... و يحطون عليج ضغوطا.....0
الفاصله: مع السلامه
وسط ذهول الكل....0
الشكاكه: احد يروح ايشوفها اكيد ريلها طايحله على وحده هذي حامل مو زين لها الزعل
الشله طلعت وراها و الاّ الفاصله مشغله السياره و قاعده... فتحنا الباب عليها مخترعين..." فيج شييييييي"......0
الفاصله بكل برود: شفيكم.... قاعده احرر السياره.......!0
الشله: بهالحرررررررررررررر
bye xoxo